كيفية عمل سماد مركب ( تركيب الأسمدة )

في البداية لازم نعرف مع بعض

يعني ايه سماد ؟؟

السماد ماهو الا مادة ومركب كيميائي يتم تخليقه في المعامل والمصانع ويحتوي على عناصر غذائية يحتاجها النبات خلال مراحل نموه ويتم اضافت اما في التربة ( تسميد ) او مع مياه الري ( التسميد مع الري fertigation )

وعليه فإن النبات يحتاج لمجموعه من العناصر الغذائية وعلى رأسها النيتروجين والبوتاسيوم والفسفور
وعليه هناك اسمدة نيتروجينية وهي التي يكون العنصر الفعال فيها هو النيتروجين وكذلك لباقي العناصر والتي تسمى مغذيات كبرى

إذن ... السماد البسيط : -

هو الذي يحتوي على عنصر واحد من العناصر الغذائية التي يحتاجها النبات

والسماد المركب ..

هو الذي يحتوي على اكثر من عنصر غذائي وهو خليط من الاسمدة البسيطة بنسب معينة ومحسوبه كما سيلي 

لو حبينا نتكلم عن السماد البسيط ونقول

ان كل سماد له نسبة مئوية للعنصر الفعال

وليكن مثلا لدينا سماد نترات الامونيوم

وهو احد الاسمدة النتيروجينية يكتب على

الشكارة من الخارج 33.5 % وهي تعني

ان ...

كل 100 كجم من نترات الأمونيوم تحتوي

33.5 كجم نيتروجين

ونخلي المعلومه دي في بالنا كويس قوي

هانحتاجها بعدين ...

طيب لازم كمان نعرف حاجه مهمه جدا ان

كل مرحلة عمرية للنبات تحتاج دفعات

معينة من العناصر فمثلا في مرحلة النمو

الخضري تكون نسبة النيتروجين مرتفعه

وفي النمو الزهري والثمري تزيد نسبة

البوتاسيوم مقارنة بالنيتروجين مثلا

ودي معلومة تانيه لازم نعرفها برده

طيب .... ايه حكاية السماد المركب دي

لما نتكلم عن السماد المركب لازم نعرف

مصطلحات مهمه جدا

...

أ-تحليل السماد ...

وهو عباره عن نسبة العناصر الفعالة

بالنسبة للسماد المركب ككل وتكتب بالرمز

التالي n-p-k فمثلا اذاكتب على السماد

المركب الرمز التالي 5-10 -5 فهذا يعني

انه

سماد مركب تحليله 5- 10 -5

بمعنى أن كل 100 كجم من هذا السماد المركب تحتوي على :

5كجم نيتروجين

10 كجم فسفور

5 كجم بوتاسيوم

ب- النسبة السمادية ...

ودي عباره عن نسبة العناصر الفعالة لبعضها البعض ودا معناه

لو انا عندي وحدة وزن نيتروجين هاحط قصادها كام وحدة

بوتاسيوم وكام وحدة فسفور ورمزها العام n:k

يعني لو اخدنا مثل السماد اللي فوق اللي تحليله 5-10-5

وقلنا ان دا معناه ان كل 100 كجم سماد مركب فيهم 5 كجم

نيتروجين و10 فسفور و5 بوتاسيوم طيب لو حبينا نجيب نسبتهم

لبعض الموضوع بسيط هانقسم كل الأطراف على أقل رقم وهوا

عندي الخمسة فتكون النسبة

( 5/ 5 ) : ( 10 /5 ) : ( 5/ 5)

لتكون النسبة ... 1: 2: 1

يعني ايه ...

لو حطيت مثلا كجم نيتروجين هاحط قصادة الضعف فسفور ونفس

الكمية بوتاسيوم

طيب انا عماله من الصبح اقول كجم نيتروجين وفسفور

وبوتاسيوم بس الحقيقة ان العناصر مش بتكون موجوده خام كدا

دي بتكون داخل تركيب كيميائي

يبقى لازم بمعلومية اللي فات نعرف ازاي

لو انا عندي تحليل السماد ( والتحليل يحدده كما قلنا المرحلة العمرية واحتياجات النبات وهذه يحددها الخبير او الدارس لبرنامج التسميد ) اجيب النسبة

واقدر أحسب الكميات المطلوبه من

الاسمدة المختلفة اللي لما اخلطها على

بعض تديني التحليل المطلوب ؟؟؟

                                   

عرفنا مع بعض دلوقت النقاط الأساسية

للدخول في المهم هانعرف مع بعض في

الاول مجموعه من المغذيات المعدنية

واللي بنقول عليها أسمدة بسيطة

أسمدة نيتروجينية ( آزوتية ) ....

نترات الأمونيوم ( 33.5%)

سلفات (كبريتات) الأمونيوم ( 20.5 % )

اليوريا ( 46%)

وهي المصادر الشائعة وهذا لاينفي وجود مصادر أخرى

أسمدة فوسفاتية ...

أشهرها سوبر فوسفات الكالسيوم ومنه الاحادي والثنائي والثلاثي ( 18%)

أسمدة بوتاسية ..

سلفات البوتاسيوم (46 - 50%)

وهكذا .....

طيب انا لوعايز اعمل سماد مركب يعني

خلطة من مصادر مختلفة لازم اعرف

تحليل السماد واعرف المصادر اللي


هاخلطها مع نسب العناصر الفعالة فيها

وبحسابات بسيطة اقدر اعرف هاوفر

النسبة المطلوبه من قد ايه من الأسمدة

اللي عندي

والتالي مثال بسيط للتوضيح وهانحله مع

بعض بناءا على ماسبق ...

نركز مع بعض شويه ...

لو افترضنا اننا نريد القيام بتحضير طن

من سماد مركب تحليله 5-10-5 وكان

لدينا الأسمدة التالية : نترات الأمونيوم

33.5% وسلفات البوتاسيوم 50%

وسوبر فوسفات الكالسيوم 18% ؟؟

انتهى السؤال ...

لو فردنا المعطيات اللي عندي عشان

ابتدي احضر التركيب

هانقول ..

الكمية الكلية = 1طن = 1000 كجم

التحليل السمادي 5- 10 - 5

الاسمدة المتوفرة بنسب العناصر الفعاله كما سبق ...

الحل ....

بتفسير تحليل السماد يتبين لنا ان 5- 10 - 5 تعني أن...

كل 100 كجم سماد مركب تحتوي ...

5كجم نيتروجين , 10 كجم فسفور , 5كجم بوتاسيوم

لحد كدا تمام ....

بس أنا الكمية اللي عندي مش 100 كجم سماد مركب أنا عندي

طن = 1000 كجم

لو بدانا بالنيتروجين ...

اذا كان كل 100 كجم سماد مركب تحتوي 5كجم نيتروجين

فإن ال 1000 كجم تحتوي (س ) كجم نيتروجين

بضرب الطرفين في الوسطين فإن ...

س = ( 1000 * 5 ) / 100

س = 50 كجم نيتروجين

يبقى انا كدا عرفت ان انا يلزمني 50 كجم نيتروجين في الطن

عشان يوصل للتحليل المطلوب

واحنا قلنا ان النيتروجين مش بيكون في صورة خام لأ بيكون

داخل تركيب كيميائي واللي هوا عندي هنا نترات الأمونيوم

طيب انا هاعرف ازاي اخد كام كيلو من النترات عشان توفرلي

ال50 كجم نيتروجين ؟؟؟

الحكاية بسيطة جدا .... ازاي

بمعلومية ان نترات الامونيوم نسبة النيتروجين فيه 33.5%

معناه ان ...

كل 100 كجم نترات أمونيوم تحتوي 33.5 كجم نيتروجين

طيب أنا لو عايزه 33.5 كجم نيتروجين هاخد 100 كجم من

النترات طيب انا دلوقت عايزه 50 كجم نيتروجين

يبقى لو ...

100 كجم نترات ........... 33.5كجم نيتروجين

س كجم نترات ............... 50 كجم نيتروجين

بضرب الوسطين في الطرفين ...

س = (100 * 50 ) / 33.5

س = 149.246 كجم نترات امونيوم

وبكدا اكون حسبت أول مكون وبنفس

الطريقة اكمل لباقي العناصر الغذائية